Движењето „Ние сме Македонија“со протести во повеќе градови во светот

Во многу градови низ светот, Македонците под мотото „НИЕ СМЕ МАКЕДОНИЈА“ излегоа на протести. Викендов, протестите започнаа во Нов Зеланд и Израел, а продолжија и во повеќе европски градови и тоа во градот Асти – Италија, во Женева – Швајцарија, во Париз – Франција. Во Берлин – Германија протестот заврши со марш до канцеларијата на канцеларката Меркел, а демонстрантите од германската влада и од меѓународната заедница бараaт да се почитува резолуцијата на ОН, пресудата на Меѓународниот суд во Хаг и правилата на Европската Унија. Протести се одржаа и во Лондон пред просториите на Европската комисија, за утре најавуваат собир и Македонците во Малта.

Поддржувачите на движењето Македонците во Австралија, во Мелбурн и во Сиднеј најавуваат народни собранија за в понеделник, 29 јануари. Македонците во Торонто ќе протестираат на 4 февруари. Протестите организирани од повеќе патриотски здруженија во земјите каде што тие делуваат започнаа насекаде со интонирањето на македонската химна, а потоа со читање на декларацијата на Движењето „Ние сме Македонија“ во која меѓу другото се вели дека: Македонците во светот најостро ги осудуваат тековните разговори со Грција околу името на Република Македонија; неодговорниот и незаконски чин на пратениците во Собранието со изгласувањето на неуставниот закон за јазици како и разнебитувањето на унитарноста и суверенитетот на матичната држава.

При тоа, од Движењето „Ние сме Македонија“ бараат итен прекин на разговорите околу името на државата; ставање вето од страна на Претседателот на државата на противуставниот закон за јазици, организирање попис под мониторинг на реномирана меѓународна организација; не -менување на историјата на Македонија, статутот на МПЦ – ОА и интензивирање на грижата за Македонците во соседните држави. Доколку Владата на Република Македонија не е способна да ги реализира наведените барања, тогаш од движењето повикуваат на итно самораспуштање на Собранието на Република Македонија и организирање на непосредни избори. Движењето „Ние Сме Македонија“ го сочинуваат македонски организации и здруженија од светот, кои се залагаат за спречување на како што велат во декларацијата – најголемото разбитување на Македонскиот народ и понатомашното уништување на унитарноста на државата.