Најдолгото македонско оро се одигра во Австралија (ВИДЕО)

Македонскиот фестивал за храна во Мелбурн и годинава беше место каде се јадеше највкусната храна, а во придружба на традиционалната музика, се одигра и најдолгото македонско оро во Австралија. Играорците, членови на културно уметнички друштва кои допатуваа од Мелбурн и Сиднеј, го започнаа орото, што беше доволно,  потоа да се збогати танцот со расположените посетители.

https://www.facebook.com/macedonianfoodfestivalofficialpage/videos/475319109998850/

Целта со ова оро, на организаторот, Македонско австралиската организација на заедницата (MACO), беше да се поттикне единството на македонската заедница во Австралија.

– За прв пат се организира ваква иницијатива која се покажа успешна, потенцира организаторот на манифестација, Лидија Нешковски, претседателка на (MACO). Идејата може да предизвика веќе наредната година, македонското оро и официјално да влезе во Гинисовата книга на рекорди.

Манифестацијата посветена на храната, традицијата и македонската култура, се одржа по 8-ми пат во паркот во населбата Футскрај.Беа претставени традиционални македонски јадења, а промовирано беше македонското народно богатство преку танци, песни, традиционални носии, подготовка на храна.

Настапија популарни изведувачи на народна и забавна музика, како и 10 тина културно уметнички друштва од Мелбурн и Сиднеј. На штандовите покрај храна, беа промовирани книжевни изданија, кои предизвикаа интерес кај младата публика.

Еве како изгледаше 8 мото издание на Македонскиот фестивал за храна во Мелбурн.

https://www.facebook.com/macedonianfoodfestivalofficialpage/videos/411399429774036/