Прилеп домаќин на Европскиот куп во параглаjдинг

Последниот од шесте натпревари во суперфиналето од Европскиот куп во параглајдинг за 2019 година кои се одржуваат во текот на една натпреварувачка сезона, денеска и утре ќе се одржи во Прилеп.

На суперфиналето учество ќе земат педесетина натпреварувачи од 13 земји: Русија, Латвија, Словенија, Србија, Романија, Косово, Албанија, Бугарија, Кипар, Чешка, Велика Британија, Холандија и Македонија.
Клубот за екстремни спортови Скај рајдерс од Прилеп е организатор на супер-финалето од Европскиот куп во параглајдинг за оваа 2019 година. На полетувалиштето на Мечкин Камен, Крушево ќе се одржуваат натпреварите за титула, а параглајдеристите кои се сместени во Прилеп ќе слетуваат во близина на селото Алданци.
Дека станува збор за исклучително квалитетно натпреварување, покажува и податокот дека меѓу учесниците се наоѓаат и светскиот и европскиот првак во прецизно слетување, како и словенечкиот пилот Антон Свољшак, кој се’ уште го држи рекордот со 4 последователни резултати „нула“.
На учесниците во суперфиналето добредојде во Прилеп и успешно натпреварување им посака градоначалникот Илија Јованоски, кој истакна дека резултатите кои ги постигнуваат прилепските параглајдеристи придонесоа Прилеп да заземе важно место на европската и светската мапа, кога е во прашање параглајдингот.

„Како град се гордееме со постигнатите резултати на нашите клубови и параглајдеристи, бидејќи неколкумина од нив се наоѓаат во самиот врв на светската ранг листа. На сите вас ви посакувам пријатен престој во нашиот град, убави временски услови за натпревар, пријатен лет и безбедно слетување на целта“, истакна градоначалникот Јованоски.

В недела на најдобрите ќе им бидат доделени признанија и трофеи.