Вечерва започнува МТФ „Војдан Чернодрински„ со концерт на Влатко Стефаноски

Вечерва, во Центарот за култура „Марко Цепенков“, ќе биде подигната завесата на  54- то издание на  Македонски театарски фестивал „Војдан Чернодрински“. Фестивалот ќе биде отворен со претставата на Македонскиот народен театар – Скопје, „Макбет“, во режија на Нела Витошевиќ, на што ќе му претходи концертот на Влатко Стефаноски. Годинешното издание на МТФ „Војдан Чернодрински“ ќе трае од денеска, 7 јуни до 15 јуни, односно еден ден повеќе од минатогодишното издание. Во официјална конкуренција ќе се најдат 8 претстави

Годинешниот Фестивал ќе понуди неколку новитети, а најзначајните секако се воведувањето на таканаречните „тркалезни маси“ и гласањето на публиката. Уметничкиот директор и селектор на МТФ „Војдан Чернодрински“, Катерина Коцевска истакнува дека разговорите на „тркалезната маса“ ќе се случуваат веднаш после завршувањето на претставите во официјална конкуренција, освен првата вечер, кога заради отворањето на Фестивалот и концертот на Влатко Стефаноски, тие ќе се одржат следниот ден во 11 часот.

„Другата новина е што воведуваме гласање на публиката, што секако претставува
предизвик. Веднаш после секоја претстава, заедно со претставникот на театарот
чија престава се играла, ќе бидат изброени гласовите и веднаш после секој
разговор на ‘тркалезна маса’, на принцип на проценти, ќе биде соопштен бројот на
освоени гласови. На денот на доделувањето на наградите, на 15 јуни ќе биде
доделена и наградата на публиката, која ќе ја додели градоначалникот на
општина Прилеп, Илија Јованоски“, изјави уметничкиот директорт  и селектор на МТФ „Војдан Чернодрински“, Катерина
Коцевска.

Наградите за животно дело годинава им припаднаа на режисерот Владимир Милчин и актерот Бајруш Мјаку.Стручното фестивалско жири го сочинуваат Маја Вељковиќ Пановска, актер во Драмски театар од Скопје, Љиљана Богојевиќ, првенка на Хрватскиот национален театар од Вараждин и Бедиа Беговска, актер зад кој стојат стотина театарски, филмски и улоги во ТВ серии.

54 МТФ „Војдан Чернодрински“ се одржува под мотото „Ова е наше време! Време
за театар“.