ПРИЛЕП ГОСТИН НА ДУБОЧИЦА

Во рамките на подготовките за вториот дел од Супер лигата, екипата на РК Прилеп ќе одигра два меча со српскиот суперлигаш Дубочица. Првиот дуел е вечерва во 19 часот, вториот утре во 14. Во салата во Лесковац тренерот на Прилеп, Горан Кузманоски – Таста ќе има некомплетен тим, без голманите Иван Ангелески и Стефан Христоски, новодојдениот кавадарчанец Марко Трајковски, Хари Павлов, Владимир Трајкоски, Сашко Манчески и Грузиецот Хазеин Рустамов. Сепак, пред прилепскиот клуб, во кој нов е уште еден кавадарчанец, Марио Гичев, е можноста за тестирање на формата, воедно одржување на пријателските односи со клубот Дубочица, кој беше учесник на летниот турнир „Миле Нешкоски“.

Претходно РК Прилеп одигра два меча со прволигашот Вардар од Неготино, а по враќањето од Србија има време за уште некоја контрола до 3 февруари, кога е суперлигашкиот старт.