Трибина на тутунарите во Демир Хисар, сеуште нема решенија за проблемите

Вечерва се одржа уште една трибина во организација на новоформираните тутунски здруженија во општина Демир Хисар на тема „Тутунопроизводство,проблеми и решенија“ на која присуствуваа голем број на земјоделци од регионот на оваа општина и соседните. Повторно се искажаа забелешките но и разочарувањето на тутунарите од изминатата реколта на постигнатите цени. Производителите велат дека постигнатата просечна цена е помала од инвестициите кои биле вложени, а тоа е втора година по ред како работат со загуба.

Незадоволството во моментов е насочено кон откупните компании кои периодов бараат да пријават планирани површини под тутун за претстојната реколта, иако никој не ги соопштува цените по класи.  Разочарувањето е од државата која засега не пројавува интерес да ги заштити. Тутунарите велат дека ќе го намалуваат производството, кое и онака изминативе 2 години во континуитет се намалува.

Инаку, деновиве по одржани 4 трибини на истата тема, во Прилеп, Радовиш, Конче и Могила. Од забелешките и барањата на тутунарите произлегоа 3 барања:

– покачување на цените по класи, сразмерно на покачувањата на трошоците, на репроматеријалите, на ѓубривата, односно трошоците за производство, но и сразмерно на покачувањата на трошоците за живот.

– линиеарно субвенционирање на секој произведен, предаден тутун, по сите класи, вклучително и дополнителната класа на цена од 90 денари.

– вклучување на тутунарите, итно, и тоа да важи и за оваа реколта во мерката зелена нафта.

Барањата се поднесени до надлежните институции: Министерството за земјоделство, Премиерот на државата, откупувачите и до Сојузот на земјоделски здруженија.