Прв собир на суперлигашот РК Прилеп – КУЗМАНОСКИ: МОРА ПОВЕЌЕ ДА ТРЕНИРАМЕ ОД ЛАНИ

Вечерва во салата на СОУ „Ристе Ритески – Ричко“ машкиот ракометен суперлигаш РК Прилеп го одржа првиот собир, со кој е означен стартот на подготовките за претстојното првенство. Пред шефот на Стручниот штаб, Горан Кузманоски – Таста, беа речиси сите првотимци, освен тројца. Оправдано отсуствуваа десниот бек Хари Павлов и пивотот Сашко Манчески, кои имаат обврски со Младата репрезентација на Македонија, како и засилувањето од Србија, десниот бек Жарко Барјактаревиќ, чие доаѓање се очекува деновиве. Вториот нов, левиот бек Христијан Милошески, беше на прозивката.

Клубот како цел го има опстанокот во елитното друштво.

– Добро да внесеме пак една добра „хемија“, едно другарство во екипава – фактор што ни носи успех. Имаме претежно млада екипа, па мора да се запамети едно – тешко е да се остане на врвот. Сите суперлигашки екипи се засилени. Затоа мора уште повеќе да тренираме оти претстои многу тешка сезона – рече Кузманоски.

По кондицискиот дел, претстојат техничко-тактички тренинзи, па пријателски мечеви за уигрување, дотерување на формата. Закажани е прв дуел со Еурофарм Пелистер 2. Од полза ќе биде и Турнирот „Миле Нешкоски“ од 31 август до 2 септември каде учесници, покрај РК Прилеп и Еурофарм Пелистер 2 ќе бидат Тиквеш, Голден арт, Струга и српската Дубочица. Суперлигашкото првенство почнува на 8/9 септември, со гостување на Бутел во Скопје.