„Star Wars & Makedonium“ со Зоран Кардула во Прилеп !!!

Адмирал Акбар, овој пат не е во право, ова не е стапица и империјата навистина го возвраќа ударот, бидејќи силата е во слогата на локалната заедница. Центарот за современа ликовна уметност и заедницата ве покануваат на вечер на владеење на славниот витез Зоран Кардула и неговите елегантни цивилизирани креативни решенија, зачнати во култната и за многумина, омилена повеќедецениска сага „Војна на ѕвездите“.

Интерактивната трансформација, воедно е и музичка инспирација, а ќе има и интергалактичка дискусија и мини-гастрономска модификација во просториите на ЦСЛУ-Прилеп. За силата да остане со нас, освен ЦСЛУ-Прилеп и витезот Кардула, ќе се потрудат и Orengs со холограмите, Александар Џинго, Звонко Димоски, дуото ВолЧело, Трет Сектор и бродовите на Бавчика.

Ве покануваме да се појавите со вашите омилени ѕвездено-воени реквизити и модни додатоци, да ги споделите вашите омилени ликови и фрази, а сите витези да се појават со своите светлечки мечеви, посочува организаторот на оваа уникатна интеркултурна, музичка и гастрономска дружба .