Создадени предуслови за изградба на новиот театар

Советот на Општина Прилеп денеска на пладне ја одржа 43 тата редовна седница. Прилепските советници изгласаа измени во распоредот на средствата во висина од 23 милиони денари од Буџетот на општината за тековната 2020 година, односно пренемена на средства од непродуктивни трошоци во субвенции за јавните комунални претпријатија. Советниците донесоа одлука за измени во урбанистичкиот план за централното градско подрачје, со што, се создадоа предуслови за изградба на новата театарска зграда во објектот на Центарот за култура Марко Цепенков.
– Денеска се донесе одлуката за детален урбанистички план за четврт 3 блок 3.13 на подрачјето на центарот од Прилеп. Со ова се создадоа услови за изградба на новиот театар во Општина Прилеп, рече Миле Талевски, претседател на Советот на Општината.
Воедно, Советот на Општина Прилеп ја прифати донацијата на Прехранбената индустрија Витаминка на противпожарно возило и придружна опрема со вредност од 814 илјади денари за потребите на Територијалната противпожарна единица Прилеп.