Здравствен дом Крушево обезбедува пункт за примена на брзи Ковид тестови

Здравствениот дом во Крушево ќе прави брзи антигенски тестови за утврдување на Ковид 19. Тестовите се веќе обезбедени преку Министерство за здравство, како што денеска, објави здравствената установа на социјалните мрежи, а информацијата ја потврдија и од Општина Крушево. Граѓаните ќе можат проверката да закажат преку преку „Мој термин“, со матичните лекари.

„Благодарение на донацијата од Министерството за здравство, во најскоро време ЈЗУ Здравствен Дом Крушево ќе врши тестирања за COVID 19. Тестирањата ќе се прават преку Мој Термин со закажување од матичниот лекар.“, велат од здравствен дом Крушево.

За градоначалникот на општина Крушево Томе Христоски ова е уште еден важен чекор во насока на справување со вирусот, бидејќи граѓани на општината ќе имаат термини за тестирање и нема да мора да одат во соседните општини за проверка.

Со брзите антигенски тестови резултатите се добиваат за околу 20 минути. Според последната Ковид статистика во Крушево досега се регистрирани 149 случаи со корона вирус, од кои активни се вкупно 74.