Кај Оревоец: Багерите мируваат – Блокадите продолжуваат

И денеска од изутрина 6 и 30 часот прилепчани поставија блокада на патот кој што води до Оревоец. Причината е јасна – нема да дозволат машините на Бехтел и Енка да експлоатираат мермер градежен камен за тампон потребен за изградба на коридорите 8 и 10 д . Во смени граѓаните се организираа во текот на целиот ден, патот кон базата на компанијата да биде затворен – блокиран.

Протестите и блокадите ќе продолжат во континуитет се’ до исполнувањето на барањето – да се стопира со ископот на мермер бидејќи ја загрозува егзистинцијата на единствените 4 извори на питка вода во прилепско, ја загрозува природата, ги уништува ендемските видови животни и растенија. „Се загадува водата, воздухот, се ремети мирот, а ѕидовите од куќите и викендиците веќе почнаа да се оштетуваат од експлозиите при минирањето,“ велат ореовчани за што се организираат за покренување постапки за материјална оштета.

За утре во 9 часот е закажан состанок во црквата во Оревоец на кој што ќе се договараат следните чекори во врска со иницијативата која што започна со стартот на минирањето на конзорциумот Бехтел и Енка под мотото „Спас за Прилеп од еколошка катастрофа“.

Засега благодарение на блокадите на прилепчани багерите мируваат и не се врши ископ кај Оревоец, а граѓаните будно ја следат секоја активност и се организираат во што поголем број да бидат присутни на протестот.