100-тина Прилепчани пријавени за фаќање на Светиот крст

Прилеп се подготвува  за најмасовната верска манифестација  – традиционалното фрлање на Светиот крст и осветувањето на водите по повод православниот празник Богојавление – Водици. Богојавленскиот водосвет- фрлањето на крстот- ќе се изврши на 19-ти јануари,во базенот на Аква паркот „Салида„ во 12,00 часот. За фаќањето на Светиот крст пријавени се 99 верници, меѓу кои  и 7-ум девојки. Најмладата, која ,в петок на Водици, ќе скока по Светиот крст е Михаела Ристеска (2005 ), а најмлади пријавени момчиња се Филип Трајкоски (2004) и Андреј Трајкоски(2004).

На фрлањето на Светиот крстот ќе му претходи богослужба, света литургија во 4,оо часот, а од 6.30 ќе се изврши осветувањето на водите во кругот на црквата Св. Благовештени, но и истиот чин ќе се одвива и во останатите црковни храмови Прилеп.

Празникот Богојавление е поврзан со крштевањето на Исус Христос во водите на реката Јордан од Свети Јован, кој оттогаш се нарекува Крстител, а фаќањето на крстот означува соединување на човекот со Христа. Toj важи за еден од најголемите христијански празници. Со него завршуваат 12-те т.н. некрстени денови и циклусот зимски празници како Бадник, Божик, Нова Година (Василица) и други. На Богојавление на полноќ се верува дека се отвора небото, се појавува Бог, а луѓето му се обраќаат за да им ги исполни нивните желби. Во тој миг водите престануваат да течат и стануват лековити.

Петок, 19 јануари, неработен ден за православните верници

Инаку, според Министерството за труд и социјална политика дека согласно со Законот за празниците на Македонија , 19 јануари (петок), Богојавление (Водици), е неработен ден за граѓаните од православната вероисповед во Република Македонија.