CSS Template

Илија Јованоски ја презеде функцијата градоначалник на Општина Прилеп

429

Во просториите на општина Прилеп, Општинската изборна комисија му го додели уверението на новоизбраниот градоначалник на општина Прилеп. Илија Јованоски е новиот градоначалник кој своето примопредавање го направи со претходниот градоначалник Марјан Ристески.

„Најпрво сакам да му се заблагодарам на г-дин Марјан Ристески за денешниот прием, како и на Вас почитувани сограѓани сакам да Ви се заблагодарам за укажаната доверба која ми ја дадовте. Се радувам што примопредавањето помина во исклучително позитивна атмосфера и на достоинствен начин. Ве уверувам дека ќе бидам градоначалник на сите граѓани на општина Прилеп и стојам зад сите проекти што ги ветив и коишто ќе бидат реализирани токму со ваша поддршка. Во Прилеп ќе има живот за сите граѓани, посочи новиот градоначалник на Општина Прилеп, Илија Јованоски, на денешното обраќање по повод примопредавањето на градоначалничкиот кабинет.

„Му го честитам на Илија Јованоски новиот четиригодишен градоначалнички мандат, му посакувам здравје пред се, успеси во работењето и да ги реализира сите проекти кои ќе бидат во интерес на граѓаните, а во оваа прилика сакам да посочам дека мојата градоначалничка улога завршува и од денеска ќе бидам лојален прилепчанец и Македонец“, посочи претходниот градоначалник Марјан Ристески.
Уверенија добија и сите 27 советници во Советот на општина Прилеп.

„Согласно изборниот законик член 37 Општинската изборна комисија денеска на избраните кандидати им ги додели уверенијата за нивниот избор и тоа на избраниот градоначалник на Општина Прилеп и на избраните членови на Советот на Општина Прилеп. Како што знаете изборите се одржаа на 15.10.2017 година, а изборниот процес заврши во првиот круг на гласање. ДИК со посебен заклучок од 24.10.2017 објави конечност на изборните резултати. По што и ОИК ги објави конечните резултати. На градоначалникот Илија Јованоски и на членовите на Советот им го честитам изборот и им посакувам успех во наредниот 4 годишен период“, истакна Каролина Шукуроска, претседател на ОИК Прилеп.

Новиот градоначалник на Општина Прилеп, Илија Јованоски, на денот на примопредавањето на градоначланичката функција,пред преставници на граѓанските здруженија најави формирање на т.н. „Граѓански парламент“ во кој ќе членуваат сите заинтересирани граѓански здруженија, невладини организации, граѓански иницијативи, неформални групи и поединци кои сакаат да учествуваат во идеите и спроведувањето на политиката на локалната самоуправа.

Јованоски се заблагодари за масовната поддршка што му ја доверија граѓаните на 15 октомври и вети дека ќе биде еднаков за сите.

Јованоски имаше и средба со новинарите од Прилеп на која вети транспарентно и отчетно работење и соработка со сите медиуми во градот. Истакна дека Општината ќе биде отворена за сите идеи, сугестии, предлози и критики кои ќе доаѓаат од медиумите.


semm
Kreas
Vivafarm
Penata
Farma Dolneni