Предлози за ублажување на антиковид мерките

Комисијата за заразни болести денеска предложи учениците во основните училишта да не носат маски во училиштата. Ова доаѓа по падот на бројките на заразени во нашата држава во последниот период. Меѓутоа ова нема да важи и за наставниците и техничкиот кадар. Ваква препорака даде Комисијата за заразни болести, која меѓу другото предлага и други олеснувања на мерки, односно да се укине мерката за приложување сертификат за вакцинација во отворениот дел од угостителските објекти, како и капацитетот на исполнетост во затворени објекти како опера, театар и кина, од 50 да се зголеми на 75%.

Мерките треба да ги разгледа Главниот кризен штаб, а потоа се очекува и зелено светло од Владата. Од КЗБ ги повикуваат граѓаните да продолжат да се вакцинираат, бидејќи како што нагласуваат, пандемијата сѐ уште не завршила.