Прилеп го прослави патрониот празник Св Никола – нови домаќини “Теракота“

Прилеп ја прослави градската слава Св Никола. После свечената божествена литургија во црквата „Св.Благовештение“, пред параклисот во центарот на Прилеп, во присуство на неговот преосвештенство Митрополит Преспанско-пелагониски и администратор Австралиски и Новозеландски г. Петар и свештениците од прилепското црковно намесништво,  граѓани, верници, градоначалникот  на Прилеп ,Борче Јовчески, претседателот на Советот на Оптшина Прилеп, Дејан Проданоски, пратеници и гости, се одржа осветување на славскиот колач.

Минатогодишниот домаќин на градската слава, сопственикот на компанијата „Футура“, Тони Тарунџиоски, се заблагодари што беше домаќин минатата година, a сопствениците на Теракота Инжинеринг, Коса Тошески и Гордан Бошкоски, станаа  нови домаќини на градската светиниколска слава. Во таа чест тие од градоначалникот на Прилеп добија икона и посакаа годинава што доаѓа да мине во љубов , среќа, благодет на граѓаните на Прилеп, со надеж дека ќе се надмине здравствената криза и пандемијата.

„Традицијата претставува идентитет на секоја држава, а нешто што не прави горди нас како прилепчани е токму таа, уметничкото творештво, историјата, археолошките локалитети, познати музички, актерски, спортски имиња и презимиња. Во таа насока јас како градоначалник, ќе продолжам да го развивам актуелното творештво, со се поголем интензитет, а Општина Прилеп ќе ги чува и негува локалните традиции и духовноста обновувајќи го Прилеп како препознатлива дестинација во која ќе може секој еден турист, гостин, добронамерник да не посети и да го доживее  духот на вековното традиционално наследство. Во знакот на празничната симболика би сакал на сегашниот и новиот домаќин да им го честитам денешниот празник и да им посакам Свети Никола да им донесе многу здравје, среќа и бериќет . А на вас мои прилепчани да верувате во моите заложби и ветувања! Господ да не благослови сите, Нека е честит големиот празник Свети Никола! За многу години!” истакна градоначалникот Борче Јовчески.