ШАХ: ШЕСТМИНА МАКЕДОНЦИ СЕ БОРАТ СО ЕВРОПСКАТА ЕЛИТА

Во Брежице, Словенија, се одржува Европското поединечно шаховско првенство, на кое меѓу 317 учесници од 40 држави се шестмина претставници на Македонија. Тоа се: ВМ Кирил Георгиев, ФМ Емил Ристески, Филип Михов, ФМ Роберт Велески, Антон Златков и Хедон Мифтари. Засега, по четири одиграни кола, велемајсторот Георгиев е на 105. место со 2,5 поени, по победите над Израелецот ФМ Ори Кочави и над ФМ Валентин Митев, ремито со Словенецот ВМ Марко Тратар, поразот од Украинецот ВМ Јуриј Козубов. Ристески е на 134. место со 2 поена, Михов на 225. и Златков на 241. со по 1,5, Мифтари на 262. и Велески на 269. со по 1 поен. Во тек е 5. коло на кое Георгиев за противник го има ИМ Јаир Парков од Израел, Ристески игра со ВМ Арсениј Нестеров, Михов се среќава со Артем Лутко од Украина, Златков е противник на интермајсторката Зала Урх од Словенија, Мифтари игра со ИМ Ангело Дамиа од Италија, додека Велески е на мегдан со Маркуш Златанович од Словенија.

Досега единствен со сите четири победи е ВМ Гудмундур Кјартансон од Исланд, кој стартуваше од 133 позиција.

Извор: www.shampion.mk