Вечна им слава – 21 година од погибијата кај Карпалак

Со положување на свежо цвеќе и поклонение пред споменикот во кругот на касарната „Мирче Ацев“, изграден во чест на загинатите десет прилепски бранители започна одбележувањето на 21-та годишнината од трагичниот настан кај месноста „Карпалак“, каде во конфликтот 2001 година, животот го загубија десетте припадници на безбедносните сили на Р.Македонија, од Прилеп: Саше Китаноски, Нане Наумоски, Бранко Секулоски, Марко Деспотоски, Ердован Шабаноски, Љубе Грјуоски, Дарко Вељаноси, Веби Рушидоски, Горан Миноски и Пеце Секулоски.
По тој повод делегации од АРМ, Општина Прилеп, семејствата на загинатите, Здруженијата на бранителите положија свежо цвеќе и ја посетија спомен собата во чест на загинатите херои. Во таа пригода, на присутните им се обрати, Славчо Кузманоски, заменик командат на касарната „Мирче Ацев“, кој истакна дека врската и споменот за овие херои ќе останат и нема да бидат заборавени, но напомена дека треба и во иднина да се залагаме никогаш тоа да не се повтори.
По повод одбележувањето на 21-на години од трагичниот настан кај месноста Карпалак, доцна попладне беше положено свежо цвеќе и пред споменикот во село Лениште на кој се испишани имињата на десетте загинати резервисти кои загинаа на 8-ми август во конфликтот, 2001-та година. Потоа делегациите го посетија и манастирот Св.Петка во близина на село каде се служеше Вечерна богослужба.

Утре, на 8 август, делегации ќе се упатат на месноста Карпалак на патот Скопје-Тетово, ќе бидат посетени вечните почивалишта на загинатите бранители на прилепските градски гробишта и во населените места, а во 10 часот ќе се одржи панихида во црквата „Света Петка“ во  населбата Точила. Во 13 часот е централното одбележување пред споменикот „Карпалак“ во центарот на Прилеп.