Машкото вокално трио од Културно-уметничкото друштво „Кирил Пејчиновиќ“ од Теарце е добитник на Гран-при наградта за најдобра изведба на 47 Фестивал на народни инструменти и песни „Пеце Атанасовски“ што заврши синоќа на Рудина, Долнени. Гајдата на Пеце за најдобар гајдаџија ја доби Филип Арилон од Велес.
Според жирито, етномузиколози, д-р Родна Величковска и м-р Стојанче Костов од Институтот за фолклор „Марко Цепенков“ од Скопје и д-р Горанчо Ангелов од музичката академија при универзитетот „Гоце Делчев“ од Штип, машкото вокално трио од КУД „Кирил Пејчиновиќ“ од Теарце многу успешно го претставува посебното гласоечко пеење од долно-полошкиот регион кое е заштитено од УНЕСКО како нематеријално културно наследство. Младиот гајдаџија Филип Арилон успешно ги пренесе звуците на гајдата, покажувајќи ја умешноста на свирењето на овој народен инструмент.
На Фестивалот се доделени и 10 специјални награди-статуетки за успешно негување на изворниот мелос од групи и поединци. И тоа на: КУД „Дримкол“ Вевчани, вевчански лазарки, на КУД „Русалии“ од Секирник, Струмичко, на КУД „Дуфла“ од Рашче, Скопје, на Детскиот традиционален оркестар при КУД „Илинден“ од Битола, на Фолклорниот ансамбл „Етнос“, на ФА „Љупчо Сантов од Оризари, Кочани, на Фолклорната група „Копачка“ од селото Драмче, Делчево, на Оркестарот за изворни инструменти и ора при Центарот за култура „Бели мугри“ од Кочани, на Музичко-балетското училиште „Илија Николовски-Луј“ кое е единствен училишен центар што има насока за традиционална музика и игри, и на гајдаџијата Роберт Митров од Јаргулица, Радовишко.
47 Фестивал на народни инструменти и песни „Пеце Атанасасовски “ се одржуваше на 2 и 3 јули во Прилеп и на Рудина, Долнени. Годинава учествуваа околу 320 изведувачи, групи и поединци, од сите краишта на земјава. За првпат по 25 години на Фестивалот одекнаа звуците на оригиналната гајда на основачот и големиот уметник Пеце Атанасовски. Се одржаа и: Семинар за изучување на народните инструменти и песни („он-лајн“) со 12 млади учесници од Кочанско и Прилепско и Симпозиум на тема „Фолклорот во минатото и денес“ со еминентни етномузиколози, а е издаден и Зборник на трудови од фолклористиката.
Овој реномиран национален фестивал е под покровителство на министерството за култура и со поддршка на општините Прилеп и Долнени.