Четири програми беа презентирани денеска на третата форумска сесија за планирање на Буџетот на Општина Новаци за 2023 година. Станува збор за предлог проекти кои се однесуваат на инфраструктурно доуредување и комунални зафати за заштита на животната средина.
Пред присутните жители на Општина Новаци беа презентирани други четири програми од буџетот со предлог проекти и тоа:
Програма Ф1 – Урбанистичко планирање. Во оваа програма планирани се 2 милиони денари, средства од Агенцијата за финансиска поддршка на земјоделството и руралниот развој
Програма ЈД – Изградба и реконструкција на локални патишта и улици. Во оваа програма планирани се 3.231.567,00 денари, дел средства од Агенцијата за финансиска поддршка на земјоделството и руралниот развој а дел од сопствени приходи.
Програма РА –Заштита на животна средина и природа. Во оваа програма планирани се 5.752.000,00 денари, средства од Министерството за животна средина и просторно планирање и голем дел од средствата ќе бидат наменети за изградба на пешачката патека до манастирот Рождество на Пресвета Богородица во Новаци.
Програма Ј4 – Јавна чистота. Во оваа програма планирани се 6 милиони денари, средства од Буџетот на Општина Новаци и истите ќе бидат искористени според потребите и согласно програмата која ќе биде разгледана Iи одобрена на Совет.
Од присутните граѓани на форумот при разгледувањето на горенаведените четири буџетски програми беа дадени следните предлози: изградба на индустриската зона во Новаци, изградба на деловни простории, паркинг простор кај гробиштата и кај основното училиште во Новаци, пешачка патека до манастирот, реновирање на фасадите на зградите во центарот на Новаци, изградба на рекреативен парк во Новаци, велосипедска патека Битола – РЕК по трасата на топловодот, изградба на отворен и затворен базен, реконструкција на детските паркчиња, промена на реквизитите, изградба на обиколница околу Новаци за тешки товарни возила, игралиште кај ветеринарната станица, реконструкција на патот Рибарци – Грод – Гнеотино, доизградба на патот во продолжение на тој што се асфалтираше оваа година во Долно Агларци, доасфалтирање на пат во с. Далбеговци, да се реконструира улицата кај црквата Св. Атанасиј и полициската станица во Новаци, акции за пошумување, работилници за подигнување на општата свест кај децата и возрасните за зачувување на чистотата и животната средина, поставување на канти за отпадоци и контејнери во Новаци, времено ангажирање на работиници за јавна чистота и сл.
Целта на програмата „Форуми во заедницата – Буџетски форум“ е планирање на општинскиот буџет за следната 2023 година во консултација со граѓанството во зависност од нивните потреби. Буџетскиот форум е најдобра можност општината да покаже високо ниво на транспарентност и отчетност пред граѓаните. За граѓаните ова е можност да увидат дека планирањето на ограничените средства не е воопшто лесно и дека општината не може да ги оствари сите приоритети.