Над 200 дечиња оваа година ќе учествуваат во Бадниковите поворки кои се одржуваат под мотото ,,Почувствувај радост”. Од денеска, петок 5 ти јануари ги започнуваат активностите. По пробата од 10:00 часот, децата ќе го посетат Домот за стари лица „Киро Крстески – Платник“, каде што дечиња – ангелчиња ќе им ги честитаат претстојните празници на штитениците во домот и ќе го најават Христовото раѓање. Утре, Бадник, 6 ти јануари, поворката започнува од Камената бина во 10:00 часот каде што децата ќе ги отпеат песничките ,,Вечниот Бог”, ,,Тропар на Рожденство Христово” и ,,Кондак на Рожденство Христово”. Тука дечињата ќе бидат пречекани од градоначалникот на Прилеп, г-динот Борче Јовчески кој симболично ќе ги дарува.
Пеејќи ја ,,Вечниот Бог”, поворката продолжува кон уличките низ старата чаршија, а потоа се враќа до божиќната пештера во центарот на градот.
Поради одржувањето за прв пат на Божиќен конкурс при храмот Св Петка -Точила, по завршувањето на поворката во центарот на градот, нашата група ќе се упати кон тој храм.Прогласувањето на победниците и доделувањето на наградите за овој конкурс ќе биде во 11:30 часот во храмот. Децата во поворките ги симболизираат ангелите што го најавуваат Христовото Раѓање, а ѕвездичките што радосно ги веат над своите озарени лица се водилка кон местото каде што се раѓа Богомладенецот.Симболично прикажано, кај нас тоа е патот до божиќната пештера во која е претставен целиот настан на Христовото Раѓање – Божиќ.Ве покануваме на поворката и на Божиќниот конкурс за сите заедно, радосно и достојно да го најавиме Христовото раѓање, посочуваат од организацијата Бадникови поворки Прилеп.
