По повод светскиот месец на книгата (октомври), во организација на македонските културни здруженија „11 октомври“ од Солинген и „Македонско сонце“ од Дизелдорф, денеска се одржа промоција на книгата од д-р Бранислав Светозаревиќ-Покорни „Македонци – милениумски сведоштва за македонското име“ во Македонскиот културен центар „Македонско сонце“ во Дизелдорф.
Оваа година здружението „11 октомври“ од Солинген прославува 35-годишен јубилеј и настанот е покриен со богата културно-уметничка програма и настап на македонските естрадни уметници Татијана Стефановска и Миле Кузмановски дополнето со сплет на македонски ора во изведба на фолклорните друштва „Македонија“ од Уна и „Македонско сонце“ од Дизелдорф.
Целoвечерниот концерт на македонските уметници има хуманитарен карактер и средствата се донираат на хуманитарната организација „Св.Спас“ од Драчево во помош на нивните проекти и на лицата на кои таа им е најпотребна.
Честитајќи го јубилејот на домаќините, авторот Светозаревиќ-Покорни одржа одлично предавање пред присутните изнесувајќи бројни факти за македонското милениумско постоење и цитираше бројни светски имиња кои пишувале за Македонија, македонскиот народ и македонските обичаи.
Книгата на д-р Светозаревиќ-Покорни „Македонци – милениумски сведоштва за македонското име“ и понатаму доживува невидена популарност во Македонија и во иселеништвото во време кога македонскиот идентитет и јазичен простор доживува кулминација во негово негирање од соседите на Македонија во обид да се избрише трагата за постоење на Македонците.
Носечки цитат на неговото дело е фрагментот од италијанскиот историчар и писател Џорџо Нуриџани кој во својата книга за Македонија издадена во 1933 година во Рим вели:
„Сите завојувачи на Македонија, од Хелените и Римјаните, до варварите во текот на нивните преселби и Турците – сите се обиделе да ја избришат македонската свест, наметнувајќи ѝ на земјата административни имиња, и тоа вештачки. Но залудно. Кој е роден во Македонија знае и се изјаснува дека е Македонец“.
Д-р Бранислав Светозаревиќ-Покорни е историчар, архивист и еден од основачите на Музејот на македонската борба и негов прв директор во периодот од 2010 до 2018 година.
Исклучитено плоден истражувач на македонското минато и автор на капиталното дело „Македонци – милениумски сведоштва за македонското име“ кое доживеа неколку изданија на македонски и англиски јазик и автор на бројни стручни трудови, рецензии и телевизиски емисии. На македонската јавност Бранислав Светозаревиќ-Покорни е исто така познат по бројните награди кои ги добива во промоција на македонската филателистика во светот и поседува богати збирки на ретки поштенски марки и поштенски картички кои подеднакво се претставени на изложби во Македонија и во странство.
По повод октомври – месецот на книгата, авторот Бранислав Светозаревиќ-Покорни својата книга ќе ја презентира во десеттина градови низ Германија каде се организирани предавања и културно-уметнички програми воедно прославувајќи ги големите национални празници 11 октомври – денот на востанието на македонскиот народ против фашизмот (1941) и 23 октомври – денот на создавањето на Внатрешно македонската револуционерна организација (ТМОРО/ВМРО) во Солун (1893).