На денот на виното и денот на вљубените, во кафе-галеријата „Лувр“ во Прилеп, по седми пат се одржа поетскиот перформанс „Љубење со стихови“ во органзиација на Здружението ЗОКУМ (Здружение за образование, култура и уметност).
Поетите, Филип Димкоски и Лина Димоска, членови на ЗОКУМ, пред публиката се претставија со дел од нивната поезија со љубовни мотиви, а во програмата прозвучија и стиховите на француските поети на љубовта како Жак Превер, Гијом Аполинер, де Беранже, Бодлер, Пол Елијар, Стефан Маларме, Артур Рембо и други.
Специјален гостин во програмата овојпат беше Љупка Томиќ, авторка и професорка по француски јазик, која овозможи публиката да ја чуе поезија на француски.
Поетската вечер беше исполнета со топлина и инспирација. Публиката уживаше во стихови што носеа емоции, мисли и убавина, а атмосферата беше интимна и возвишена. Секој настап остави силен впечаток, создавајќи чувство на заедништво и духовно богатство. Вечерта заврши со аплаузи и насмевки, како доказ дека поезијата навистина ги поврзува луѓето.
Кафулето, кое е во стилот на уметноста, успеа да ја надополни сета таа атмосферата во кои сите искрено уживаа. Зажалија само оние кое не присуствуваа на вечерта. А, Здружението ЗОКУМ уште еднаш докажа и потврди дека зазема клучна улога во организирање на културни настани кои ја поврзуваат публиката преку поезијата, потврдувајќи се како вистински промотори на културата во Прилеп.