„Клетници“ од прилепскиот театар, најдобра претстава на 53. МТФ „Војдан Чернодрински“

Претставата „Клетници“ на прилепскиот народен театар е најдобрата претстава во целина на годинашниов 53. МТФ „Војдан Чернодрински“, соопшти фестивалското жири на денешната прес-конференција.
Воедно, претставата „Клетници“ од Виктор Иго во режија на Мартин Кочовски се закити со уште три награди: за главна женска улога за актерката Ангела Наумоска, за Горјан Милошевски за современа сценска драматизација на романот „Клетници“ и награда за музика за групата „Фолтин“.
Жирито во состав Мими Таневска Србиновска, претседател и членовите Јасна Новаков и Драган Спасов-Дац наградата за најдобра режија му ја доделија на Диего Де Бреа за претставата „Крал Лир“ на турскиот театар, а наградата за најдобра машка улога ја понесе Сашко Коцев во претставата „Ничија земја“ на МНТ од Скопје.
МТФ „Војдан Чернодрински“ своето 53 издание го завршува вечерва со доделување на наградите на сцената од Центарот за културата „Марко Цепенков“ кога во чест на наградените Театар Комедија ќе ја изведе претставата „Не сега драга“.