Во преполната голема сала на Општина Прилеп, вечерва, на иницијатива на градоначалникот Илија Јованоски се одржа уште една неформална седница на Граѓанскиот парламент. Присуствуваа претставници на урбаните и руралните заедници од општината, од невладините организации, спортски клубови, здруженија на граѓани, како и првите луѓе на јавните претпријатија.
Најпрво, градоначалникот Јованоски ги презентираше тековните проекти, како и оние кои наскоро ќе започнат. На врвот од листата за приоритетно решавање е состојбата со Градскиот стадион „Гоце Делчев“, на објектот интензивно се работи, беше посочено, и тоа на реконструкција на двете трибини, со средства обезбедени од Општина Прилеп, додека санацијата на теренот е во надлежност на ФФМ.
Од инфраструктурните проекти кои се во тек на реализација беа посочени реконструкција на Булеварот „Гоце Делчев’, изградба на мостот кај Сточниот пазар каде по распишаниот тендер познат е изведувачот и наскоро ќе почнат градежните работи. Како еден од приоритетните проекти беше посочен и набавката на 4 нови градски автобуси на метан за потребите на јавниот градски превоз, проектот „Нови авантури, нови можности – Прилепско езеро, Заштита и делување – Маркови кули.
Градоначалникот Јованоски потенцираше дека локалната самоуправа делува и во секторот за рурален развој каде ќе се реализираат 2 проекти за подобрување на патната мрежа од Волково до домот Прилепец, како и реконструкција на патот Прилепец до манастирот Свети Никола. За прв пат за вкупно 30 села ќе се изработуваат Детални урбанистички планови.
Во фокусот и на овој Граѓански парламент беа проблемите со кои што се соочуваат здруженијата и граѓаните од целата општина, а најчесто се од областа на инфраструктурата и комуналното уредување.
Ова беше 6 ти по ред Граѓански парламент.