Централната манифестација по повод Богојавление – Водици во Општина Кривогаштани претпладнево се одржа во црквата Света Пречиста во Кривогаштани. На фрлањето на Светиот крст му претходеше богослужба, света литургија која започна во 6 часот и 30 минути, а традиционалниот ритуал со положување на светиот крст се одржа во 9 часот . На положувањето на светиот крст во базенот во дворот на Црквата Света Пречиста во Кривогаштани – учество зедоа 6 момчиња од кои најсреќен беше Даниел Рикалоски.
– Се фрлам по петти пат, а ова ми е втор пат како имав среќа да го фатам светиот крст. Oвој ден за мене е голем ден. Се фрлам по петти пат за здравје и среќа.
Бог се јави – навистина се јави, рече Даниел Рикалоски.
Годинешен домаќин на чествувањето по повод Водици во Општина Кривогаштани беше Јавното комунално претпријатие Пелагонија од каде на Даниел Рикалоски и на сите учесници во манифестацијата им беа врачени пригодни награди.
Традиционално, положувањето на светиот крст за Водици се одбележува во сите населени места во општината.