Во Институтот за тутун привршува верификацијата на мострите за тутунскиот откуп, процедура која што е неопходна за утврдување на проценката на вагите, односно за селекцијата на квалитетот на производството. Следи отворање на пунктовите во зависност од утврдената динамика на компаниите . Годинава во трката за преземање на реколтата се вклучени 10 откупувачи. Проценките на претставниците на тутунарите, Сојузот на земјоделски здруженија, се дека нема во голема мерка да бидат надминати договорените 23 илјади тони ориентален тутун.
– Според договорите, откупните компании се обврзани да преземат и плус 10 отсто повеќе од количината со кооперантите, иако сметам дека поради временските прилики, особено во периодот од првите берби, нема да биде исполнета квотата која што е пријавена во ресорното министерство. И годинешната реколта е со одличен квалитет, вели Мендо Стомнароски од Сојузот на земјоделски здруженија.
Досега, за предвремен откуп, пријавена е само една компанија, Сокотаб, која што започнува од понеделник, 16 ти ноември, со преземање на реколтата. Неофицијално, до крајот на месецов ќе се приклучат уште двата откупувачи Тутунски Комбинат и Алијанса. Според законот за тутун, 15 ти декември е најдоцниот датум за сите да ги отворат вратите на пунктовите за откуп.
Според утврдените цени во договорите првата класа е 280 денари, втората е 206, третата изнесува 155, а четвртата класа е 90 денари. Останатите, дополнителните класи цените се 80 и 60 денари.