Близу половина век грижливо негување, чување и поттик за младите генерации да не заборават на македонското културно изворно наследство, тоа е Фестивалот на народни инструменти и песни Пеце Атанасовски. Традицијата продолжува и оваа година 47 ма по ред од како формално се одржува Фестивалот, а се одбележува 25 години од смртта на Атанасовски.
Векови претходно, тоа бил музички собир на вљубениците на гајдата, кавалчето, тапанот и изворното пеење на Рудина кај селото Долнени по повод Спасовден – селската слава. Дека Фестивалот предизвикува голем интерес и во време на пандемија говори податокот што се пријавиле за настап во рамките на двете фестивалски вечери над 600 музичари, поединци и групи од земјава и странство. Селекционата комисија имаше навистина многу работа, велат организаторите, да ги одберат реномираните музичари кои достоинствено ќе го претстават изворното музичко наследство на двете сцени во Прилеп и Долнени.
Првата фестивалска вечер ќе се одржи утре со почеток во 20 часот на камената бина, плоштад Александија во Прилеп, додека втората ќе се реализира в сабота од 19 часот на амфитеатарот кај Долнени, од каде ќе се разлее вековната, исконска мелодија на гајдата, кавалот, тапанот, од меките грла на момчиња и девојки вљубеници и поддржувачи на изворниот мелос од различни етникуми во Македонија.
Младите не само што имаат голем интерес за изучување на македонскиот мелос, туку прават напори и за избработка на изворните инструменти, вели магистар ГОРАН ВАСИЛЕВСКИ, фолклорист – секретар на фестивалот во отворената програма на Радио Пела .
Гајдата, оригиналната на Пеце Атанасовски по 25 години повторно ќе засвири на камената бина и во долненско. Како и секоја година на фестивалот му претходеше семинар на тема „Традиционалната култура игрите пеењето и инструментите во Мариово, а в сабота ќе се одржи Симпозиум на тема: Фолклорот во минатото и денес, промоција на зборник на трудови.