Општина Крушево со средства од Европските фондови -Прекугранична соработка ќе ја подобрува спортско – туристичката инфраструктура за промоција на градот во меѓународни рамки. Грантот во висина од над 700 000 евра е во рамките на прекуграничната соработка со Албанија, општина Елбасан, Албанија, а се вклучуваат и неколку организации. Градежните зафати кои се планирани вклучуваат: изградба на паркинг до параглајдинг полетувалиште заедно со хортикултурно уредување на барање на параглајдеристите кое ќе се комплетира по поставувањето на нова вештачка трева и изградба на објект; поставување на две станици кои ќе го мерат квалитетот на воздухот, брзина и насока на ветрот. Воедно, од останатите активности планирани се изградба на „Даунхил“ патека за одржување на натпревари во планински велосипедизам на високо, професионално ниво; ЛЕД осветлување на градот; промотивни активности на Крушево како атрактивна туристичка дестинација, како и обуки и надградување на капацитети на угостителскиот сектор.
„Продолжуваме со работа во туризмот. Градиме инфраструктура и меѓународно го промовираме Крушево. Изминатите месеци интензивно работевме на проектот за прекугранична соработка со Албанија и успеавме да го добиеме грантот. Крушево има иднина во туризам!“, посочи градоначалникот на општина Крушево Томе Христоски.