Шаховскиот клуб Прилеп оствари најголем успех од осамостојувањето на Македонија освојувајќи го второто место во екипна конкуренција на Државното првенство кое се одржа во Струга. Изминативе 3 децении прилепските шахисти на државните првенства освојувале највисоко трето место, но никогаш не успеале да ја достигнат вицешампионската титула. Ова е феноменален успех на прилепските шахисти кои настапија во состав: Тони Кироски, Бобан Богосављевиќ, Никола Седлак, Мирослав Миљковиќ, Дејан Стојаноски, Славе Трајкоски и Кире Николоски.
Според Тони Кироски успехот се должи на воиграноста, сплотеноста и екипната желба за надигрување и докажување со противниците: “Досега на државните првенства сме биле најпозитивни и најсплотени, а за тоа многу помогнаа турнирите кои што се одржуваа во Прилеп, со што се одржува кондиција и позитивна енергија кај екипата.“
(ШК) Алкалоид ја освои титулата во машка, додека шахистките од МШК Центар беа најуспешни во женска конкуренција.
Конечен пласман:Мажи – ШК Алкалоид, ШК Прилеп, ШК Гамбит Ассеко СЕЕ, ГШК Куманово, ШК Гостивар, ШК Ан Пасан, ШК Фишер, ШК Стево Патако.
Жени – МШК Центар, ШК Алкалоид, ГШК Куманово, ШК Гамбит Ассеко СЕЕ, ГШК Неготино, ШК Стево Патако, ШК Карпош.