Со првиот чукнат час во новата година и струјомерите почнаа да вртат по нови цени, а на сметките се воведе и нова давачка – пристап до мрежа која за сите корисници од денеска 1ви јануари ќе чини 200 денари. Оваа ставка ќе важи за сите и ќе ја плаќаат и оние кои имаат празни станови, куќи и викендици. Новиот додаток се воведува за да има фер распределба на трошокот на мрежа меѓу редовните корисници и оние кои повремено ги користат објектите.
Инаку, потрошувачите во првиот блок ќе плаќаат поевтино за 5,16%, за втор блок и евтината тарифа останува иста, а благо покачување има во третиот и четвртиот блок од 2,88%, односно 1,86%. Овие цени се збир од цената на електричната енергија плус мрежарината.
И додека граѓаните се навикнуваат на новите цени и давачката – месецов ќе треба да се избере и нов Универзален снабдувач. Дали повторно ќе падне во рацете на ЕВН Хоум, ќе зависи од тоа дали ќе понуди најниска профитна маржа на тендерот.