Бадниковата поворка во Прилеп со радост и песна го најави Раѓањето Христово – Божик. Над 200 дечиња учествуваа во најрадосната поворка под мотото ,,Почувствувај радост” денеска, Бадник, 6 ти јануари. Во 10:00 часот поворката започна од Камената бина каде што децата ги пееја песничките ,,Вечниот Бог”, ,,Тропар на Рожденство Христово” и ,,Кондак на Рожденство Христово”.
Дечињата тука беа пречекани и дарувани од градоначалникот на Прилеп, Борче Јовчески.
Пеејќи ја ,,Вечниот Бог”, поворката продолжи кон уличките низ старата чаршија, а потоа се врати до божиќната пештера во центарот на градот, од каде се упати кон храмот Св Петка -Точила. Во овој свет храм за прв пат се одржува Божиќен конкурс а денеска беше прогласувањето на победниците и доделувањето на наградите за конкурсот. Децата во поворките ги симболизираат ангелите што го најавуваат Христовото Раѓање, а ѕвездичките што радосно ги веат над своите озарени лица се водилка кон местото каде што се раѓа Богомладенецот.