За седуммината кандидати за Претседател денеска е последниот ден за претставување пред граѓаните пред изборниот молк кој што настапува денеска од полноќ и ќе трае до затворање на гласачките кутии на 24 април во 19 часот.
Кандидатката за претседател Гордана Силјановска Давкова, поддржана од ВМРО-ДПМНЕ и коалицијата „Твоја Македонија“ денеска ќе биде на средби и митинзи со граѓаните на Лозово, Карбинци, Пробиштип и на Штип.
Кандидатот Максим Димитриевски поддржан од движењето „Знам за наша Македонија“ денеска попладнево ќе оствари средба со граѓаните на Радовиш, Василево, Ново село и Босилово. Централниот митинг на кандидатот за претседател Димитриевски ќе одржи во Струмица во големиот градски парк пред споменикот на револуцијата со почеток од 19 и 30 часот.
Граѓанскиот кандидат Стево Пендаровски, подржан од кослицијата ,, За европска Македонија “, предводена од СДСМ, ќе има средба со жителите на Демир Хисар и митинзи во Ресен и Битола.
Билјана Ванковска од Левица поддршката ќе ја бара во Кичево и во Гостивар.
Кандидатот за претседател Стевчо Јакимовски ќе има средби со граѓани од Ѓорче Петров и од село Волково.
Претендентот Арбен Таравари од коалицијата „Вреди“ вечер ќе има митинг во Скопје пред Скендербег. Со агенда за презентирање на програмата продолжува и кандидатот од ДУИ и коалицијата Бујар Османи.