Денеска 1 август, е ден кога Русија го одбележува Денот на сеќавањето на руските војници кои загинале за време на Првата светска војна, која се смета за прва трагедија на човештвото на глобалното ниво.
По тој повод во организација на Амбасадата на Руската федерација во Македонија и на Македонско руско друштво – Прилеп, со пригодна церемонија и со панихида, во спомен на загинатите руски војници, на Германските гробишта во Прилеп беше одбележана годишнината од почетокот на Првата светска војна, односно oд влегување на Русија во таа војна.
По тој повод делегација од Амбасадата на Руската федерација во Македонија, Македонско руско друштво – Прилеп и од Општина Прилеп, положија свежо цвеќе и им одадоа почит на загинатите руски војници.
На германските гробишта во Прилеп, кои Германската амбасада ги ревитализираше пред речиси две децении, освен германски и руски војници, почиваат и војници од Унгарија, Бугарија и од други држави.
Односно, на Германските воени гробишта во Прилеп, на површина од 7200 метри квадратни се закопани 1683 Германски војници (од кои 45 се од Втората светска војна), 40 Австро-унгарски, 39 Бугарски, 33 војници од поранешна Југославија, 21 од Романија, 10 од Русија, 8 од Албанија и 5 Турски војници. На овие гробишта е исто така закопан Heinrich Ebert, синот на првиот претседател на Германија Friedrich Ebert (1871–1925). Гробиштата биле формирани по Првата светска војна и по Втората светска војна, до 1955 одржувани, а до 2006 г. биле во исклучително лоша состојба. Процесот на реновирање започна во 2006 година до 2009 и денес овој простор преставуава меморијален споменик.