Четвртооделенците од ООУ „Рампо Левката“ денес го одбележаа месецот на книгата преку средба со поетот и новинар Филип Димкоски која се случи во нивното училиште. Наставничката Бисера Вишиноска која е организатор на средбата, истакна дека ваквите настани им се потребни на децата затоа што на најдобар начин, преку интеракција им се доближува книгата, нејзината важност и значење.
Поетот Димкоски, на учениците на сите четвртооделенци од ова училиште и на нивните наставнички Елизабета Маркоска, Анета Мицеска и Анета Спасеска им го раскажа патот на книгата од ракопис, преку издавачка куќа и печатница, па до објавување и нејзино изложување во книжрниците и библиотеките. Им читаше песни од неговите книги „Заедно да растеме“, „Најхранливи зборови од детска душа дарови“ и „Овошје и зеленчук“, а во некои од изведбите ги вклучи и учениците кои рецитираа и драматизираа.
Беа спомнати и датумите во годината кои се поврзани со книгата, а со помош на децата заеднички учеа и за литературата, но и за медиумската писменост прославувајќи го јубилејот-80 години од објавата напрвиот македонски дневен весник Нова Македонија, кој првпат е испечатен на денешен ден, како и шеесет и шесте години од објавувањето на додатокот за деца „Колибри“, создаден од поетесата Евгенија Шуплинова која потекнува од прилепско Тополчани.