Амбулантно возило за олеснување на пристапот до основните здравствени услуги на ромската заедница во Прилеп денеска беше донирано во Општата болница. Возилото е донација од невладините „Целим“ од Милано, Ромскиот ресурсен центар од Скопје и „Рома Перспектив“ од Прилеп, а финансирано од Европската Унија. Целта е преку мобилната клиника да се овозможат основни прегледи за околу 5 илјади Роми кои живеат во Прилеп, а најголемиот дел немаат основни услови за обезбедување на здравствена заштита.
– Она што е специфично е дека ова возило не е само транспортно, туку е и мобилна клиника. Со Општината и со болницата договоривме план со кој ќе се овозможуваат основни здравствени прегледи во ромската заедница, најмалку двапати месечно. Тимот од болницата ќе оди редовно да ги спроведува основните здравствени прегледи, а возилото е опремено за тоа, изјави Себитан Демировски, генерален менаџер на Ромски ресурсен центар од Скопје.
Прилепската болница има потреба од амбулантни возила и донацијата е добредојдена, посочи Кире Јоноски директор на прилепската општа болница.
-Во договор со невладината организација ќе направиме скрининг, испитувања на социјално загрозените пациенти. Проектот започна уште минатата година. Поради недостигот а и застареност на амбулантните возила, секако дека возилото е добредојдено. Возилото е целосно опремено со дефибрилатор, ЕКГ- скрининг, за кислородна поддршка и многу ќе помогне, рече Јоноски.
Општина Прилеп останува посветена на создавање инклузивна општествена средина, во која секој граѓанин, без разлика на етничката припадност, има пристап до квалитетни услови за живот, образование, здравствена заштита и економски развој, посочи градоначалникот Борче Јовчески при примопредавањето на возилото.
– Во оваа прилика, сакам да им се заблагодарам на Европската Унија, на партнерските организации и на сите институции кои несебично придонесуваат во реализацијата на овој значаен проект, рече Јовчески.
Донацијата на возилото е една од активностите во рамки на проектот за обезбедување подобри услови за живеење на ромската заедница во Прилеп, што се имплементира три и пол години. Возилото ќе биде своевидна мобилна клиника и во ромската заедница ќе има основни прегледи најмалку двапати месечно.