Општина Прилеп одлучи да олабави дел од рестрикциите кои се применуваа за заштита од корона вирусот. Градскиот пазар освен во работните денови, од понеделник до петок, како што работеше изминативе неколку седмици, од оваа сабота се отвара за граѓаните. Работното време на пазарот во сабота ќе биде од 7 до 15 часот, со примена на протоколите за заштита од вирусот КОВИД-19, потенцираше градоначалникот Илија Јованоски. Втор чекор за релаксирање на рестрикциите е воведувањето на јавниот градски превоз.
– После продолжениот празничен викенд, односно од вторник 26 мај, се воведува јавниот градски превоз, при што во функција ќе биде ставена вонредната неделна линија, со запазување на мерките за заштита од коронавирусот, истакна градоначалникот Јованоски на денешната прес конференција, на која што информираше и за состојбата во изминатото деноноќие со коронавирусот.
Во општина Прилеп денеска се регистрирани двајца оздравени и еден новозаболен. За жал, уште еден наш сограѓанин, ја загуби борбата со оваа подмолна болест.
На инфективното одделение во Општата болница „Борка Талески“, хоспитализирани се 16 лица, од кои 14 се позитивни на коронавирусот.
Градскиот пазар ќе работи и во сабота, стартува и јавниот градски превоз
