Дека Крушево целосно се враќа со туристичка и културна понуда е доказ рестартот на театарските претстави, предводени од талентираните крушевски актери. В петок, во 19 и 30 часот, во оспособената сала за театар и кино, во горната училишна зграда, ќе се одигра претставата Еден маж и повеќе жени во изведба на Михајло Миленкоски, Захарија Ангелеска и Аница Бебиќ.
Текстот е работен по мотиви на истоимениот драмски текст од Леонид Зорин, чиишто превод, адаптација и режија се на Захарија Ангелеска. Ова е четврт авторски проект и за прв пат ќе биде поставен во Крушево, но и на театарската сцена во Македонија.
“Еден маж и повеќе жени ”е претстава која ве поканува во светот на Гарунски, маж кој е зашеметен од низата изненадувања кои му ги приредуваат жените околу него. Создадени од истата природа, жени обединети, кои постојано се менуваат – една е премногу обична, друга премногу вознемирена, една премногу добра, друга премногу авторитетна, трети очајни или неизлечиво романтични, успеваат да го трансформираат Гарунски во мажот на денешницата. Тоа е една константна борба помеѓу половите – тема која потсетува на разноликоста и спектарот на нивните мисли и дејствувања. Но, ако некогаш беше актуелно дека мажите се од Марс, а жените од Венера, денес ќе се запрашаме од каде всушност доаѓаат нашите битија и на што сé се спремни, за да остават трага во историјата на своето постоење. Оваа претстава преку нејзината едноставност ќе ви ја долови деликатноста на прашањето ” Што сум јас? “, се вели во најавата за настанот.
Влезот за оваа невообичаена, филозофкса и интересна театарска престава е 150 денари, а местата се ограничени поради протоколите за заштита од Ковид 19.