Тутунски комбинат АД Прилеп има нов генерален извршен директор на местото на досегашниот Кирил Станкоски. Според информацијата од Македонска берза, компанијата Тутунски Комбинат ги извести инвеститорите дека Зоран Пачешкоски, инаку дипломиран економист, е избран за Генерален извршен директор.
Одборот на директори на компанијата, покрај Пачешкоски, ќе добие уште еден извршен член, а тој е Гоце Котески од Прилеп, магистер по економски науки.
За оваа ценовно чувствителна информација компанијата ги извести инвеститорите преку Македонската берза:
„Врз основа на член 97 и член 98 од Статутот на Тутунски комбинат АД Прилеп, Одборот на директори на Тутунски комбинат АД Прилеп за извршни членови во Одборот на директори ги избра следните членови: Зоран Пачешкоски од Прилеп, дипломиран економист и Гоце Котески од Прилеп, магистер по економски науки.
Одборот на директори на Тутунски комбинат АД Прилеп за Генерален извршен директор на Тутунски комбинат АД Прилеп го избра Зоран Пачешкоски од Прилеп“, се вели во објавата од Одборот на директори до Македонската берза.
Инаку, Зоран Пачешкоски претходно неколку години работеше како раководител на подрачната единица на Министерството за земјоделство, шумарство и водостопанство, а за прв човек на Комбинатот доаѓа од УЈП. Воедно, тој е претседател на општинската организација на СДСМ Прилеп.