Индустриското училиште во Прилеп започнува нова ера во македонското образование

Со донацијата на компанијата Филип Морис ТКП во висина од 80 илјади долари за целосно реновирање на училници со најсовремена опрема во средното општинско училиште Ристе Ристески – Ричко во Прилеп за прв пат стопанските субјекти се вклучуваат во таканаречното дуално образование. Соработката помеѓу Филип Морис ТКП и Средното општинско училиште Ристе Ристески – Ричко ќе продолжи и во делот на практичната настава, со потпишувањето на Меморандум со што се овозможува пракса за учениците во текот на целата година во капацитетите на фабриката. На настанот присуствуваше вицепремиерот Кочо Анѓушев, министерот за транспорт и врски Горан Сугарески, градоначалникот на Општина Прилеп Илија Јованоски, претседателот на Совет на Општина Прилеп Миле Талевски, пратеници и претставници од прилепскиот бизнис сектор.
– Се надевам ова ќе биде поттик и за другите компании да го следат примерот. Ние како држава работиме на создавање на кадар соодветен на потребите на пазарот преку воведување на дуалното образование и практикантство со што ќе се реши акутниот проблем на невработеност и ќе се задоволи побарувачката на пазарот на труд“, потенцираше Анѓушев.
За Тутунски Комбинат Прилеп ова е начин да обучува кадри кои во иднина ќе бидат дел од колективот на фабриката. „Многу е важно да се искористат потенцијалите на младите кадри. Тие му се потребни на Тутунски комбинат којшто со помош на Филип Морис поставува нови стандарди во тутунската индустрија во земјава и полека успеваме да го вратиме Комбинатот на позиции од порано, како стратешка фабрика со позитивни резултати”, изјави Кире Станкоски, директор на ТКП.
За директорката на средното училиште, Билјана Трајкоска „Филип Морис ТКП е првата општествено одговорна компанија која инвестира сопствени ресурси за подобрување на образовните капацитети на училиштето“, при што се реновирни просториите и инсталирана е најсовремена опрема за практична настава од електротехничка струка.
Работната посета на Прилеп вицепремиерот Анѓушев ја започна со увид на напредокот во модернизација во Тутунски комбинат. Станува збор за осовременување на производна хала со површина од над 5.000 метри квадратни. Инсталирана е нова машина за производство на цигари со потенок прогресивен формат или т.н. 7.0 формат што овозможи во изминатиов период да почне да се произведува Chesterfield 7.0 и да се започне со производство на Marlboro 7.0. како најбрзо растечки формати на македонскиот пазар.