Завршува одморот за фудбалерите, па вече од утре, понеделник, 10 јануари, фудбалерите на ФК Победа ќе ги започнат подготовките за пролетниот дел од втората полусезона во Втората лига-Исток, за одбрана на есенската титула и влез во Прва лига. Официјално зимскиот преоден рок за фубалерие започнува на 15 јануари, а ќе трае до 11 февруари, но веќе утре ќе се знаат дел од фудбалските имиња кои ќе го засилат тимот на Победа .
Со тренинзи на екипата, по успешно минатиот период на рехабилитација, се очекува да се приклучи стоперот Христијан Кукески, а на располагање на стручниот штаб ќе бидат и двајцата млади фудбалери Давид Дебрешлиоски и Христијан Поп-Антоски, кои се враќаат од 6-месечната позајмица на Братство, и ќе конкурираат како за првата екипа така и за кадетско-младинските екипи.
Од играчите кои настапуваа во есенскиот дел од Победа заминуваа Петар Најдов, Дарко Дигаловски и Кирил Неделков.
Според планот на спортскиот директор Благоја Гешоски и Шефот на Стручниот штаб, Димитар Капинковски екипата во Прилеп ќе тренира до 24 јануари, а потоа ќе замине на 10-дневни подготовки во Стар Дојран. За време на подготовките во Дојран ќе бидат одиграни и првите контролни натпревари, со Кожуф (27 јануари) и Беласица (2 февруари), а закажани се и две посилни контролкни средби во Прилеп со Тиквеш (6 февруари) и генералката со Воска (12 февруари).
Пролетниот дел на Втората лига-Исток со 16-тото коло продолжува на 19 февруари со гостување на Братство на Могила, во 17-тото коло на 26 февруари гостување на Детонит во Радовиш а за крај на вториот круг во 18-тото коло е дуелот со Беласица во Прилеп на 5 март.