Секој понеделник и среда во општина Кривогаштани, и секој вторник и четврток во општина Долнени од овој месец започнуваат со работа подрачни канцеларии на Меѓуопштинскиот центар за социјална работа – Прилеп. Канцелариите ќе обезбедуваат поддршка за жителите во остварувањето на права од социјална и детска заштита преку воспоставувањето на мобилни тимови кои ќе обавуваат теренски посети во руралните средини. Отворањето на подрачни канцеларии на Центарот за социјална работа – Прилеп во општина Кривогаштани и општина Долнени, за жителите ќе овозможи навремено информирање за права од социјална и детска заштита, поголема достапност на социјалните услуги на локално ниво и информирање за националните програми на Агенцијата за вработување.
Оваа заедничка иницијатива на јавната институција Меѓуопштинскиот Центар за социјална работа – Прилеп, општините Долнени иКривогаштани и ЛАГ АГРО ЛИДЕР ќе се надополнува со детектирање на предизвиците со кои се соочуваат жителите во селата, и креирање на идејни решенија кои ќе одговорат на реалните потреби и ќе придонесат за подобрување на квалитетот на живот во руралните средини. Проектот се реализира со поддршка на австриското Министерство за социјални работи, здравство, грижа и заштита на потрошувачи преку проектот “Подобрување на пристапот до социјални услуги преку дигитализација и вмрежување” кој го спроведува Мрежата на Локални Акциони Групи на Австрија во партнерство со Мрежата на Локални Акциони Групи во нашата држава и ЛАГ АГРО ЛИДЕР.