Воведна седница денеска одржа Советот за поддршка на женското претприемништво за општина Прилеп на која присуствуваа жени од бизнис сферата, но и жени кои управуваат со различни сектори во компаниите, како и во образовниот систем. Свое поздравно обраќање имаа градоначланикот на општина Прилеп Борче Јовчески, претседателот на Советот на општина Прилеп Дејан Проданоски, Валентина Дисоска, претседател на Националната платформа, Даниела Цветаноска – локален координатор на НПЖП во пелагонискиот регион, Билјана Кузманоска – член на совет на општина Прилеп.
На седницата Талија Петреска ги презентираше програмските документи за основање на Советот. Следен чекор е формирање на Совет на женско претприемништво кој што би функционирал во општина Прилеп, а чија што основна цел е споделување информации, искуства и создавање на партнерства во бизнис заедницата.
Во голем број на општини во земјава формирани се Совети за поддршка на женско претприемништво со цел посветување на поголема поддршка на жените претприемачи, креирање политики за родово буџетирање, унапредување на родовата рамноправност и програми за финансиска поддршка за жените кои ја почнуваат својата претприемачка приказна.
Советот, пред се, ќе креира политики за да го олесни пристапот во учеството на жените во оштественото дејствување и ќе дејствува во насока на подобрување на родовите улоги и елиминирање на ограничувањата, а ќе креира и можности за економско зајакнување на жените.