Еко алармот за заштита на животната средина, на човекот, на водата, на воздухот, на живиот свет во околината на Прилеп, Оревоец, Плетвар, Присад – свети ВО ЦРВЕНА БОЈА. Граѓанските мирни протести за Спас за Прилеп повеќе од 60 денови се активни кај базата на Бехтел и Енка за ископ на градежен материјал за изградба на коридорите 8 и 10д. Граѓаните поставуваат барикади на локалниот пат кон Оревоец и не дозволуваат машините да работат.
Велат штетата е непоправлива врз здравјето на луѓето, се загадува околината, во опасност се изворите на питка вода, единствени во општина Прилеп, а се уништува и живиот свет. Паралелно, Иницијативниот одбор на протестите, трае и правната битка преку адвокатот Жарко Стеваноски.
Покренати се три правни иницијативи: за оценка на уставноста за експлоатација, се бара утврдување на состојбата на терен и оценка на влијанијата врз населението и животната средина, како и времен прекин на активностите. Рубин Рујаноски е еден од 20 тината жители кои секојдневно се соочуваат со загаденост на воздухот, на водата која што ја добиваат од природните извори:
-Многу организации и домашни и светски се заинтересираа со пеперутката Чинговска Окатка, но ниту една организација не го актуелизира проблемот за заштита на човековото здравје, околината, чистиот воздух и водата. Заболувањата од карцином, особено на белите дробови се зголемува во Прилеп. Заканата е сериозна, во опасност е доведено здравјето на луѓето, жители на Прилеп. Покрај тоа Бехтел и Енка ја уништија смреката, шумата од 3 до 7 хектари, а ни го попречија и правото на движење, го блокираа патот, го попречуваа движењето, минираа, со што ги уништија куќите, испукаа ѕидовите и на црквата. Оревоец е натпештерско село. После 15 метри сондата му пропаѓа при бушење, вели Рујаноски, кој беше гостин во студиото заедно со Ѓорѓи Ѓорѓиоски, активист и Жарко Стеваноски, адвокат, застапник на Иницијативниот одбор на протестите.