Почнувајќи од 12 јули вакцинацијата на граѓаните ќе се одвива во постоечките вакцинални пунктови од здравствените домови и болниците во државата, а во спортските сали ќе се одвива масовна ревакцинација, информира Министерството за здравство .
Секој граѓанин ќе може да се вакцинира без разлика дали е пријавен или не се пријавил на веб-страницата вакцинација.мк , од 12 јули и тоа да го направи без закажан термин, а паралелно ќе се одвива и вакцинацијата на граѓаните кои се пријавиле на вакцинација.мк. Здравствените домови каде што досега се вршеше вакцинација до петок, ќе треба да изготват план за теренска вакцинација – со комбе ќе се оди во селата и во руралните средини, а граѓаните кои досега не биле во можност да се вакцинираат против ковид-19, ќе можат да примат вакцина на лице место. Жителите на руралните средини ќе бидат информирани кој ден и на кое место ќе се врши вакцинацијата.