Вчера (07.12 2020) на 80 годишна возраст, почина прилепскотo, новинарско легендарно перо, Драги Драгољуб Башески, познат меѓу прилепчани како Драги Баше.
Драги Башески е роден во Прилеп,1940 година. Во електронските и пишаните медиуми бил од 1958 год. Завршил Педагошка академија во Битола и Белград. Пишувал за весниците: Народен Глас, Вечер, Нова Македонија, Белградски фудбал, Слободна Далмација, Титоградска победа, Скок и Македонски спорт.
![](https://radiopela.mk/wp-content/uploads/2020/12/img906.jpg)
Башески соработувал со Радио Прилеп, каде што повеќе години ја уредувал младинската емисија, спортскиот журнал и други емисии од повеќе области. Бил спортски коментатор во Радио Прилеп,во Радио Скопје. Од 1991 година пишувал за спортскиот придонес на Методија Андонов-Ченто, за што објавил фељтон во спортскиот неделник Скок. Објавил повеќе публикации во кои пишувал за Панде Чесноска, Душан Герамитчиоски и Даниел Алексоски.
Негови дела: за спортските легенди, „Прапорчиња“, „Панде Чесноска“, монографијата „Перото на прилепските новинари“, „Родот Башевци од Варош“, „Предадени“, сатирично-хумористичната книги, ќе останат како траен спомен за неговото дело и живот.
![](https://radiopela.mk/wp-content/uploads/2020/12/karikatura-Baseski-1-696x598-1.jpg)
Баше, ја сакаше и ја обликуваше карикатурата. Како карикатурист, се занимаваше со цртање на карикатури со молив, хемиски налив и туш. Имаше приредено повеќе изложби на карикатури од сите сфери на секојдневието, опшествениот живот, политиката и спортот.
Спортистите ќе го паметат како одличен спортски новинар, кој коментирал и пишувал за нивните успеси и падови; културните работници како публицист, човек визонер, уметник, карикатурист, љубител на пишаната реч и истражувач; новинарите, како колега, кој несебично се вложувал во поддржување и афирмирање на новианрската професија, во нејзино етаблирање во опшественото живеење како важна дејност, во креирањето на важноста и улогата на новинарот , како човек пример за професионелен новинар, кои секогаш излегувал во пресрет на младите колеги да им помогне и да ги едуцира. А, заедницата, таа, ќе го памети како граѓанин со ведар лик, почитуван , уважен, угледен, ценет и признат секаде каде што бил присутен со неговиот лик и дело.
Почивај во мир!