ВО РК ПРИЛЕП ЗАСЕГА ДВЕ НОВИ ЗАСИЛУВАЊА

Првиот овогодишен собир на машкиот суперлигаш Прилеп се одржа во салата од СОУ „Ристе Ристески – Ричко“. Тренерот Горан Кузманоски – Таста им даде одмор неколку дена на голманот Зураби Цинцадзе, централниот бек Мириани Гавашелишвил и десното крило Реваз Чантурија кои имаа натпревари за репрезентацијата на Грузија, додека пивотот Александар Тренчевски е единствениот кој замина, во Финска, но со намера да се врати за плеј-аутот.

Многу важно е што повредените заздравуваат – левото крило Казеин Рустамов и пивотот Сашко Манчески. Што се однесува до нови играчи, двајца веќе дојдоа 23-годишниот централен бек Марио Гичев и 20-годишниот пивот Марко Трајковски (двајцата од Тиквеш), а можно е да дојде и трет, на бековска позиција. До продолжението од Супер лигата на 3 февруари претстојат неколку пријателски натпревари, меѓу кои два на 21-22 јануари со Дубочица во Лесковац.