Во пријатна атмосфера, со музиката на Теодора Зероска, Мила Москов, групата „Прилепски еснаф“ и со новогодишен огномет, граѓаните на Прилеп ја дочекаа новата година на градскиот плоштад „Методиј Андонов-Ченто“.
Градоначалникот Илија Јованоски на своите сограѓани им порача во Новата 2020 година да влезат со убави мисли, од старата година да ги паметат само позитивните и убавите работи, лошите да ги остават зад себе.
Традиционално, градоначалникот ги посети службите кои во новогодишната ноќ водеа грижа за безбедноста и здравјето на граѓаните на Прилеп: вработените во службата за Итна медицинска помош, Полициската станица од општа надлежност – Прилеп и пожарникарите од Територијалната противпожарна единица. Дежурните во сите три служби потврдија дека ноќта поминала мирно, без никакви интервенции или посериозни инциденти. Претходно, во текот на вчерашниот ден, градоначалникот Јованоски ги посети дежурните војници и офицери во касарната „Мирче Ацев“.
