Советот на Општина Прилеп денеска ја одржа 38 итна седница со единствена точка на дневниот ред Усвојување на буџетот на Општина Прилеп за 2020 година.
Имено, по забелешките од Министерството за финансии, или поточно – одделението за буџети на локалната самоуправа, денеска, Буџетот на Општина Прилеп „преживеа“ одредено прекројување или консолидација. Станува збор за формалност околу планираниот трансфер од Јавното претпријатие за државни патишта за реализација на годишната програма, во делот на реконструкцијата на патниот правец Прилеп – Волково.
– Проблем беа 9 милиони денари планирани како трансфер од Јавното претпријатие за државни патишта во лимитот над 3 годишниот просек. Согласно мислењето и насоките од министерството пристапивме кон забелешките и при тоа извршивме усогласување на сопствените приходи на основниот буџет и тие забелешки ги вградивме во дополнителниот материјал што беше доставен на разгледување на советниците, изјави Драге Звездакоски, раководител на сектор за финансиски прашања на Општина Прилеп. .
Советот на Општина Прилеп денеска го изгласа консолидираниот Буџет, кој што изнесува 1.523.107.000,00 денари. Од нив, Основниот буџет е проектиран на 669.041.000,00 денари, односно точно во границите на дозволениот лимит.
Инаку, првиот предлог буџет на Општината, Советот на Општина Прилеп го подготви на 6 ти декември 2019 година. Во таа форма, со неколку амандмани буџетот беше усвоен на 26 ти декември.