Денеска, со полагање свежо цвеќе пред споменикот во центарот на Прилеп, беше одбележана 62 годишнината од смртта на првиот претседател на Президиумот на АСНОМ, Методија Андонов-Ченто.
– Тој беше првиот претседател на Президиумот на АСНОМ и неговиот придонес за македонската држава ќе остане во сеќавањето на сите сегашни и идни генерации, изјави градоначалникот Илија Јованоски.
Пред споменикот на Методија Андонов – Ченто свежо свеќе положија претставници на Советот на општина Прилеп, Сојузот на борци, политички партии и здруженија на бранители.
Од ОК на ВМРО ДПМНЕ Прилеп денеска реагираа на начинот на одбележувањето од страна на прилепската локалната самоуправа и, како што рекоа на лицемерието од власта.
– Го сменија уставното име на Република Македонија, воведоа двојазичност на целата територија во државата и тука во Прилеп, ја распродаваат најевтино македонската историја, се’ она за кое Ченто не се борел. Не само што распродаваат се’ што е македонско, туку во своите намери газат преку најголемите великани како Ченто и неговото семејство и фамилија. Како што Ченто настрадал од нивните предци, сега му ја кројат судбината и на неговиот правнук Јане Ченто, кој борејќи се за истиот идеал на својот прадедо, сега отслужува затворска казна одредена од оваа предавничка власт. На крај да запрашам, зошто се одбележува 62-годишнината од смртта на Методија Андонов-Ченто, без присуство на членови од неговата потесна или поширока фамилија, запраша на средба со новинарите Петар Ристески, претседател на ОК на ВМРО ДПМНЕ Прилеп.