Во храмот Св. Петка во Прилеп, утре ( 13 ноември, среда) ќе се одржи концерт насловен „Поетот на клавишите: Шопен и младите таленти“ со почеток во 19.00 часот.
Во оваа уникатна вечер, прилепчани ќе имаат можност да слушнат седуммина млади пијанисти од Државното музичко училиште во Битола, како и таленти од Прилеп и Битола кои веќе имаат остварено значајни успеси и признанија на бројни концерти и натпревари, претставувајќи ги со гордост Прилеп, Битола и Македонија.
Под водство на своите професорки, д-р Татјана Божиновска, м-р Билјана Димовска и м-р Маја Божиновска, овие талентирани пијанисти го претставуваат најдоброто од младинскиот музички потенцијал на нашата земја. Нивниот беспрекорен труд, извонреден талент и посветеност на музиката ни овозможуваат уживање во креациите на Шопен и го оживуваат духот на пијаното на нашите простори.
Во програмата ќе настапат: Димитриј Стојчевски, Анастасија Петреска, Давид Стојчевски, Кристијана Илиевска, Софија Михајловска, Дафина Момироска, Лина Димовска и Ангела Момировска.
Во прекрасниот и акустичен амбиент на храмот Света Петка, кој станува препознатлив не само како духовен ами и како културен центар, ве покануваме да присуствувате и заеднички да ги поддржиме овие млади виртуози. Вашето присуство и поддршка не само што ќе ја потврдат вредноста на нивниот труд, туку и ќе придонесат кон продолжување на ваквите духовни и културно-уметнички настани во иднина- велат од Организацискиот одбор при храмот „Св. Петка“